ដោយ មួង ណារ៉េត
2022-04-10
លោក ជឿន សារឹម អនុប្រធានប្រតិបត្តិគណបក្សភ្លើងទៀននៅខណ្ឌច្បារអំពៅ រាជធានីភ្នំពេញ ដែលអាជ្ញាធរអះអាងថា បានស្លាប់ដោយសារគ្រោះថ្នាក់ចរាចរណ៍កាលពីថ្ងៃទី៩ ខែមេសា នៅម្តុំស្ពានស្លាគូ ស្រុកត្រាំកក់ ខេត្តតាកែវ។
រូប៖ ហ្វេសប៊ុក Saroem Chourn
គណបក្សភ្លើងទៀន និងគ្រួសារជនរងគ្រោះទាមទារឱ្យអាជ្ញាធរបើកការស៊ើបអង្កេតដោយឯករាជ្យជុំវិញមូលហេតុនៃការស្លាប់របស់សកម្មជនគណបក្សនេះ គឺលោក ជឿន សារឹម កាលពីថ្ងៃទី៩ ខែមេសា។ ការអំពាវនាវនេះ គឺដោយសារតែរូបលោកធ្លាប់ត្រូវជនមិនស្គាល់មុខលបវាយ និងអាជ្ញាធរតាមឃ្លាំមើលសកម្មភាពនយោបាយជាបន្តបន្ទាប់។
គណបក្សភ្លើងទៀន និងសាច់ញាតិ មានមន្ទិលសង្ស័យចំពោះការស្លាប់របស់លោក ជឿន សារឹម អនុប្រធានប្រតិបត្តិគណបក្សភ្លើងទៀននៅខណ្ឌច្បារអំពៅ រាជធានីភ្នំពេញ ដែលអាជ្ញាធរអះអាងថា បានស្លាប់ដោយសារគ្រោះថ្នាក់ចរាចរណ៍កាលពីថ្ងៃទី៩ ខែមេសា នៅម្តុំស្ពានស្លាគូ ស្រុកត្រាំកក់ ខេត្តតាកែវ បន្ទាប់ពីលោកធ្វើដំណើរពីស្រុកកំណើតមកភ្នំពេញវិញ។ ពួកគេសង្ស័យថា ករណីនេះទំនងជាប់ពាក់ព័ន្ធរឿងនយោបាយ ព្រោះលោក ជឿន សារឹម ធ្លាប់ ទទួលរងការគំរាមកំហែងពីសំណាក់អាជ្ញាធរ និងរងការលបវាយប្រហារនឹងដំបងពីជនមិនស្គាល់មុខដោយសារសកម្មភាពគាំទ្រគណបក្សសង្គ្រោះជាតិ និងបន្តគាំទ្រគណបក្សភ្លើងទៀន។
ប្រធានគណបក្សភ្លើងទៀនលោក ទាវ វណ្ណុល ឱ្យដឹងថា រហូតមកដល់ពេលនេះ អាជ្ញាធរពាក់ព័ន្ធមិនទាន់បញ្ជាក់មូលហេតុជុំវិញការស្លាប់របស់លោក ជឿន សារឹម នៅឡើយទេ។ លោកថា គណបក្សសោកស្តាយយ៉ាងខ្លាំងចំពោះការបាត់បង់សកម្មជនដែលបានបំពេញការងារនៅថ្នាក់មូលដ្ឋានដ៏ឆ្នើម ដោយមិនខ្លាចការគំរាមកំហែងពីអាជ្ញាធរ ដើម្បីការពារយុត្តិធម៌ និងប្រជាធិបតេយ្យនៅក្នុងសង្គម។ លោកទាមទារឱ្យអាជ្ញាធរមានសមត្ថកិច្ចបើកការស៊ើបអង្កេតដោយឯករាជ្យ និងឥតលម្អៀងជាបន្ទាន់ ដើម្បីបញ្ចៀសការចោទប្រកាន់នានាលើអាជ្ញាធរ និងដើម្បីធានាថា ការបោះឆ្នោតជ្រើសរើសក្រុមប្រឹក្សាឃុំ សង្កាត់ខាងមុខ គ្មានការគំរាមកំហែងផ្នែកនយោបាយ៖ «អំពាវនាវឱ្យក្រសួងមានសមត្ថកិច្ច ជាពិសេសប៉ូលិសចរាចរណ៍ដែលនៅកន្លែងកើតហេតុ សូមឱ្យមានការស៊ើបអង្កេតឱ្យបានច្បាស់លាស់ ឱ្យតម្លាភាព កុំឱ្យមានពាក្យចោទរដ្ឋាភិបាលធ្វើទុក្ខបុកម្នេញលើសកម្មជនគណបក្សប្រឆាំង»។
ចំណែកប្អូនស្រីលោក ជឿន សារឹម វិញ លោកស្រីឱ្យដឹងថា រហូតមកដល់ពេលនេះ គ្រួសារលោកស្រីមិនទាន់អស់ចិត្តនៅឡើយទេ ព្រោះអាជ្ញាធរប្រាប់ត្រឹមថា បងរបស់លោកស្រីស្លាប់ដោយសារគ្រោះថ្នាក់ចរាចរណ៍ ដោយមិនបានប្រាប់ព័ត៌មានលម្អិតទៀតនោះទេ។ លោកស្រីបញ្ជាក់ថា គ្រួសារបានត្រឹមទៅយកសពមកធ្វើបុណ្យនៅស្រុកកំណើតតាមប្រពៃណីតែប៉ុណ្ណោះ។ លោកស្រីរៀបរាប់ថា សព លោក ជឿន សារឹម មានស្នាមជាំ បែកមុខ ជាពិសេសផុងលលាក៍ក្បាល។ ទោះយ៉ាងណាលោកស្រីស្នើឱ្យអាជ្ញាធរបើកការស៊ើបអង្កេត តើករណីនេះបណ្តាលមកពីគ្រោះថ្នាក់ចរាចរណ៍ ឬមូលហេតុអ្វីឱ្យពិតប្រាកដ ឬក៏ជាប់ទាក់ទងនឹងរឿងនយោបាយរបស់គាត់កន្លងទៅ៖ «ខ្ញុំក៏ចង់ដឹងដែរថាគាត់ស្លាប់ដោយសារអី បញ្ហាខ្លួនគាត់ផ្ទាល់ឬបញ្ហាអី ប៉ុន្តែពេលនេះខ្ញុំអត់ទាន់មានចិត្តអីដេញដោលទេ ដោយគ្រាន់រួចរាល់កិច្ចគាត់ហើយសិន»។
វិទ្យុអាស៊ីសេរីមិនអាចទាក់ទងអ្នកនាំពាក្យអគ្គស្នងការដ្ឋាននគរបាលជាតិលោក ឆាយ គឹមខឿន និងអធិការរងនគរបាលស្រុកត្រាំកក់ លោក ចេង ចន្រ្ទា ដើម្បីបកស្រាយជុំវិញរឿងនេះបានទេ នៅថ្ងៃទី១០ ខែមេសា។
លោក ជឿន សារឹម គឺជាសមាជិកក្រុមប្រឹក្សាជាប់ឆ្នោតគណបក្សសង្គ្រោះជាតិនៅសង្កាត់ច្បារអំពៅ២ ខណ្ឌច្បារអំពៅ រាជធានីភ្នំពេញ និងបច្ចុប្បន្នលោកជាអនុប្រធានប្រតិបត្តិគណបក្សភ្លើងទៀនខណ្ឌច្បារអំពៅ និងឈរជាបេក្ខជនលេខរៀងទី២នៅសង្កាត់ច្បារអំពៅ២ សម្រាប់ការបោះឆ្នោតអាណត្តិទី៥ខាងមុខនេះ ។ កាលនៅមានជីវិតលោកតែងបញ្ចេញមតិរិះគន់ភាពអសកម្មរបស់រដ្ឋាភិបាល និងអំពើអយុត្តិធម៌សង្គមនៅលើបណ្តេញសង្គមហ្វេសប៊ុកជាហូហែ ជាពិសេសសកម្មភាពគាំទ្រដំណើរមាតុភូមិនិវត្តន៍របស់លោក សម រង្ស៊ី កាលពីឆ្នាំ២០១៩ រហូតដល់ត្រូវបានគេគំរាមកំហែង និងលបវាយនឹងដំបងបណ្តាលឱ្យរបួសធ្ងន់ធ្ងរកាលពីឆ្នាំ២០២០ ។ ទោះរងការធ្វើទុក្ខបុកម្នេញស្ទើរគ្រប់រូបភាពយ៉ាងណាក្តី ក៏លោកនៅតែបន្តសកម្មភាពនយោបាយរបស់ខ្លួននៅថ្នាក់មូលដ្ឋានជាមួយគណបក្សភ្លើងទៀន និងបញ្ចេញមតិពីបញ្ហានានា។
ជុំវិញរឿងនេះ ប្រធានសមាគមការពារសិទ្ធិមនុស្ស អាដហុក (ADHOC) លោក នី សុខា មានប្រសាសន៍ថាសកម្មជននយោបាយបក្សប្រឆាំងតែងទទួលរងការធ្វើទុក្ខបុកម្នេញស្ទើរគ្រូបរូបភាព ប៉ុន្តែអាជ្ញាធរហាក់មិនអើពើស៊ើបអង្កេតឱ្យបានត្រឹមត្រូវដើម្បីចាត់វិធានការតាមផ្លូវច្បាប់ និងផ្តល់យុត្តិធម៌ដល់ជនរងគ្រោះនោះទេ។ លោកថាបញ្ហាទាំងនេះហើយដែលនាំឱ្យសកម្មជនទាំងនោះតែងសង្ស័យ និងចោទប្រកាន់អាជ្ញាធរ។ លោកសង្កត់ធ្ងន់ថា ករណីលោក ជឿន សារឹម នេះ អាជ្ញាធរត្រូវស្រាវជ្រាវដោយឯករាជ្យ ដើម្បីឱ្យបក្សនយោបាយ និងគ្រួសារជនរងគ្រោះអស់ចិត្ត និងបញ្ចៀសការចោទប្រកាន់ថា ជាប់ពាក់ព័ន្ធរឿងនយោបាយ៖ «ដើម្បីកុំឱ្យមានមន្ទិលទាំងអស់ហ្នឹង មានតែសមត្ថកិច្ចទេត្រូវធ្វើយ៉ាងណាខិតខំក្នុងការស៊ើបអង្កេតប្រមូលព័ត៌មាន ចាប់ជនប្រព្រឹត្ត ជនដៃដល់នោះមកផ្តន្ទាទោសឱ្យបានត្រឹមត្រូវទៅ អាហ្នឹងអាចបាត់មន្ទិលសង្ស័យផង និងអាចជួយរកយុត្តិធម៌ជូនរងគ្រោះផង បើមិនអ៊ីចឹងទេ មន្ទិលសង្ស័យនិងការចោទប្រកាន់កាន់តែធ្ងន់ធ្ងរទៅៗ ថារឿងហ្នឹងជាប់ពាក់ព័ន្ធរឿងនយោបាយ»។
គ្រួសារជនរងគ្រោះឱ្យដឹងថា ពិធីបុណ្យសពរបស់លោក ជឿន សារឹម ប្រព្រឹត្តទៅនៅស្រុកកំណើតរបស់លោកនៅភូមិត្រពាំងស្វាយ ឃុំតាផេម ស្រុកត្រាំកក់ ខេត្តតាកែវ ដោយបានបូជារួចរាល់នៅល្ងាចថ្ងៃទី១០ ខែមេសា។ ក្រុមគ្រួសារបញ្ជាក់ថា ក្រោយពេលរៀបចំបុណ្យសពរួច ពួកគាត់នឹងសាកសួរទៅអាជ្ញាធរដើម្បីបកស្រាយព័ត៌មានលម្អិតនៃមរណភាពរបស់លោក ជឿន សារឹម នេះ៕
No comments:
Post a Comment