ដោយ យន់ សាមៀន
2022-04-10
សកម្មជនគណបក្សសង្គ្រោះជាតិចំនួន១៤នាក់ ពេលសមត្ថកិច្ចដឹកតាមរថយន្តមកចូលរួមសវនាការនៅសាលាដំបូងរាជធានីភ្នំពេញ កាលពីថ្ងៃទី១៧ ខែវិច្ឆិកា ឆ្នាំ២០២១។
រូប៖ ពលរដ្ឋផ្ដល់ឲ្យ
សកម្មជននយោបាយដែលកំពុងជាប់ពន្ធនាគារថ្លែងថា ពួកគេរងគ្រោះពីការធ្វើទុក្ខបុកម្នេញ រំលោភបំពានសិទ្ធិ និងត្រូវជាប់ពន្ធនាគារយ៉ាងអយុត្តិធម៌ក្រោមស្លាកសន្តិភាពរបស់លោក ហ៊ុន សែន។ ប្រតិកម្មនេះ កើតមានក្រោយពេលលោកនាយករដ្ឋមន្រ្តី ហ៊ុន សែន អះអាងថា ប្រទេសដែលគ្មានសន្តិភាព កុំនិយាយរឿងរំលោភសិទ្ធិមនុស្ស និងប្រជាធិបតេយ្យ។ មន្រ្តីសង្គមស៊ីវិលថា បើប្រទេសមួយមានការរំលោភសិទ្ធិមនុស្ស និងលទ្ធិប្រជាធិបតេយ្យ មានន័យថា ប្រទេសនោះគ្មានសន្តិភាពឡើយ។
សកម្មជននយោបាយដែលកំពុងជាប់ពន្ធនាគារចាត់ទុកសាររបស់លោក ហ៊ុន សែន ថ្លែងកាលពីពេលថ្មីៗនេះ ជាការរំលោភលើកិច្ចព្រមព្រៀងសន្តិភាពទីក្រុងប៉ារីស ២៣ តុលា និងរដ្ឋធម្មនុញ្ញយ៉ាងធ្ងន់ធ្ងរ។ ពួកគេថា កម្ពុជាគឺជារដ្ឋភាគីដែលទទួលយកការគោរពសិទ្ធិមនុស្សដែលមានចែងក្នុងរដ្ឋធម្មនុញ្ញអង្គការសហប្រជាជាតិ ដូច្នេះការអះអាងរបស់លោក ហ៊ុន សែន ថាកម្ពុជាមានសន្តិភាព ដោយគ្មានលទ្ធិប្រជាធិបតេយ្យ និងការគោរពសិទ្ធិមនុស្សជាមូលដ្ឋានគ្រឹះនោះ គឹមិនអាចទទួលយកបានទេ។
សកម្មជននយោបាយដែលកំពុងជាប់ពន្ធនាគារបានចេញសេចក្តីថ្លែងការណ៍ពីមន្ទីរឃុំឃាំងព្រៃសកាលពីថ្ងៃទី៤ ខែមេសាថា ពួកគេរងគ្រោះដោយការគំរាមកំហែង ធ្វើទុក្ខបុកម្នេញដោយសារតែការប្រើប្រាស់សេរីភាពបញ្ចេញមតិក្នុងបុព្វហេតុការងារសង្គមនិងនយោបាយ។ ពួកគេខ្លះត្រូវបានអាជ្ញាធរចាប់ខ្លួន ដាក់ពន្ធនាគារព្រៃស អស់រយៈពេលជាងពីរឆ្នាំដោយសារតែរដ្ឋាភិបាលយកលេសការពារសន្តិភាព។
ប្រតិកម្មរបស់កម្មជនបក្សប្រឆាំងដែលកំពុងជាប់ពន្ធនាគារនេះ កើតមានក្រោយពេលលោកនាយករដ្ឋមន្រ្តី ហ៊ុន សែន កាលពីថ្ងៃទី៣១ ខែមីនា លើកឡើងថា មានតែសន្តិភាពទេ ដែលអាចធ្វើឱ្យពលរដ្ឋជៀសផុតពីសង្គ្រោម និងប្រទេស មានការអភិវឌ្ឍដល់សព្វថ្ងៃនេះ។ លោកអះអាងថា បើគ្មានសន្តិភាពទេ កុំនិយាយពីរឿងបញ្ហាសិទ្ធិមនុស្ស និងលទ្ធិប្រជាធិបតេយ្យ។ លោកបញ្ជាក់ថា ទោះក្នុងតម្លៃណាក៏ដោយ រដ្ឋាភិបាលរបស់លោកត្រូវតែការពារតម្លៃសន្តិភាពជាដាច់ខាត៖ «បានជាកត្តាសន្តិភាពនេះបានមើលឱ្យឃើញ ចាប់ផ្តើមពីចំណុចសន្តិភាពហ្នឹងហើយដែលយើងមានលទ្ធភាពដើម្បីនឹងអភិវឌ្ឍន៍ បើគ្មានសន្តិភាពកុំនិយាយដល់ការអភិវឌ្ឍ ហើយកុំនិយាយពីលទ្ធិប្រជាធិបតេយ្យ និងសិទ្ធមនុស្ស»។
កន្លងមកលោក ហ៊ុន សែន ក៏ធ្លាប់ព្រមាននឹងចាត់វិធានការកម្ទេចក្រុមមនុស្សទាំងឡាយណាដែលប្រឆាំងនឹងការដឹកនាំរបស់លោកដែរ ដោយលោកចាត់ទុកថា ជាក្រុមឧទ្ទាមក្រៅច្បាប់ និងជាក្រុមអ្នកបំផ្លាញសន្តិភាព។
ផ្ទុយពីការលើកឡើងរបស់លោក ហ៊ុន សែននេះ មន្រ្តីសង្គមស៊ីវិលបញ្ជាក់ថា មានតែការគោរពសិទ្ធិមនុស្ស និងប្រជាធិបតេយ្យទេ ទើបនាំមកនូវសន្តិភាពពិតប្រាកដ។
ប្រធានសមាគមការពារសិទ្ធិមនុស្ស អាដហុក (ADHOC) លោក នី សុខា មានប្រសាសន៍ថា ការអះអាងរឿងមានសន្តិភាពរបស់រដ្ឋាភិបាល មិនឆ្លុះបញ្ចាំស្ថានភាពពិតប្រាកដនោះទេ ពីព្រោះសន្តិភាពបច្ចុប្បន្ននេះមានសម្រាប់តែក្រុមម្ខាង រីឯក្រុមម្ខាងទៀតដែលមាននិន្នាការផ្ទុយពីរដ្ឋាភិបាលតែងតែទទួលរងការធ្វើទុក្ខបុកម្នេញ ចាប់ខ្លួនដាក់ពន្ធនាគារជាដើម។
លោកថា បើរដ្ឋាភិបាលនៅតែយកបញ្ហាសន្តិភាពធ្វើជាលេសរំលោភសិទ្ធិមនុស្សនោះ គឺផ្ទុយពីស្មារតីនៃកិច្ចព្រមព្រៀងសន្តិភាពទីក្រុងប៉ារីស ដែលនាំមកនូវការផ្សះផ្សាជាតិ និងបង្រួបបង្រួមជាតិ៖ «យើងនិយាយសន្តិភាពនៅក្នុងករណីដែលរដ្ឋាភិបាលត្រូវតែគោរពនិងទទួលស្គាល់ធ្វើមិចឱ្យប្រជាពលរដ្ឋមានសិទ្ធិសេរីភាពឱ្យបានពេញលេញ ហ្នឹងបានគេហៅថាមានសន្តិភាព មិនមែនមានន័យថាយើងរំលោភសិទ្ធិមនុស្សហើយ យើងមកនិយាយសន្តិភាពខ្ញុំគិតថាគ្មានទេ គ្មានទេសន្តិភាពក្នុងការរំលោភសិទ្ធិមនុស្ស»។
សង្គមស៊ីវិលយល់ថា ដើម្បីឲ្យប្រទេសមានសន្តិភាពពិតប្រាកដលុះត្រាតែរដ្ឋាភិបាល បើកទូលាយឱ្យប្រជាពលរដ្ឋមានសិទ្ធិសេរីភាពសម្ដែងមតិ បើកឱ្យមានការប្រកួតប្រជែងការបោះឆ្នោតដោយស្មើភាពគ្នាគ្រប់គណបក្សនយោបាយ ប្រកបដោយភាពសុក្រឹត និងយុត្តិធម៌តាមគោលការណ៍លទ្ធិប្រជាធិបតេយ្យសេរី។
សកម្មជននយោបាយដែលកំពុងជាប់ពន្ធនាគារ ក៏អំពាវនាវដល់អង្គការសហប្រជាជាតិ និងសហគមន៍អឺរ៉ុប ព្រមទាំងប្រទេសហត្ថលេខី ទាំងអស់ចាត់វិធានការណ៍លើរដ្ឋាភិបាលលោក ហ៊ុន សែន ដើម្បីឲ្យគោរពសិទ្ធិមនុស្ស និងស្តារលទ្ធិប្រជាធិបតេយ្យឡើងវិញដែរ៕
No comments:
Post a Comment