2024.12.26
អ្នកជំនួញស្និទ្ធនឹងក្រុមគ្រួសារត្រកូលហ៊ុន ដែលរងការចោទប្រកាន់ថា រកស៊ីខាងមុខរបរឧក្រិដ្ឋគឺប្រធានសមាគមឧកញ៉ាកម្ពុជាលោក លី យ៉ុងផាត់ បានដកស្លាកសញ្ញាក្រុមហ៊ុនមេ អិល.វ៉ាយ.ភី គ្រុប (L.Y.P Group) ចេញពីអគារទីស្នាក់ការកណ្ដាលរបស់ខ្លួននៅតាមបណ្ដោយផ្លូវម៉ៅសេទុង ក្នុងរាជធានីភ្នំពេញ ក្រោយរងទណ្ឌកម្មពីសហរដ្ឋអាមេរិកពាក់ព័ន្ធនឹងឧក្រិដ្ឋកម្មជួញដូរមនុស្ស និងអំពើឆបោកតាមអនឡាញ។ ឈ្មោះក្រុមហ៊ុនមេមួយនេះ ក៏ពុំឃើញមាននៅក្នុងទិន្នន័យបញ្ជីសាជីវកម្មរបស់ក្រសួងពាណិជ្ជកម្មទៀតនោះទេ ខណៈក្នុងគេហទំព័រក្រុមហ៊ុនបុត្រសម្ពន្ធ លោក លី យ៉ុងផាត់ មួយចំនួនទៀតបានកែប្រែទម្រង់ និងមិនដំណើរការ។
អគារក្រុមហ៊ុនមេរបស់លោក លី យ៉ុងផាត់ ដែលមានទីស្នាក់ការកណ្ដាលស្ថិតនៅតាមបណ្ដោយផ្លូវម៉ៅសេទុង ក្នុងរាជធានីភ្នំពេញហាក់មានសភាពស្ងប់ស្ងាត់ពុំមានមនុស្សចេញចូលច្រើនដូចមុនទេ ចំណែកឯស្លាកសញ្ញាក្រុមហ៊ុន អិល. វ៉ាយ.ភី គ្រុប ក៏ត្រូវបានដកចេញពីអគារដែរ។ ប៉ុន្តែ នៅខាងមុខអគារនៅតែមានក្រុមកងសន្តិសុខនៅចាំយាមជាប្រចាំ។
ក្រុមហ៊ុន អិល. វ៉ាយ.ភី គ្រុប របស់លោក លី យ៉ុងផាត់ ក៏ពុំឃើញមាននៅក្នុងទិន្នន័យ បញ្ជីសាជីវកម្មរបស់ក្រសួងពាណិជ្ជកម្មទៀតនោះទេ ខណៈក្រសួងពាណិជ្ជកម្មក៏មិនទាន់ចេញមុខបកស្រាយលម្អិតអំពីរឿងរ៉ាវនេះនៅឡើយដែរ។
ការដកស្លាកពាណិជ្ជកម្មក្រុមហ៊ុន អិល. វ៉ាយ.ភី គ្រុប ចេញពីមុខអគារស្នាក់ការកណ្ដាល និងការបាត់ឈ្មោះក្រុមហ៊ុនពីបញ្ជីសាជីវកម្មរបស់ក្រសួងពាណិជ្ជកម្មនេះ បន្ទាប់ពីក្រសួងរតនាគារអាមេរិកកាលពីដើមខែកញ្ញា សម្រេចដាក់ទណ្ឌកម្មដោយបង្កទ្រព្យលោក លី យ៉ុងផាត់ និងសម្ព័ន្ធអាជីវកម្មរបស់លោក ចំនួន៥ រួមមាន ក្រុមហ៊ុន L.Y.P Group, រមណីយដ្ឋានអូរស្មាច់ (O-Smach Resort), សណ្ឋាគារ ហ្គាឌិន ស៊ីធី (Garden City Hotel), រមណីយដ្ឋាន កោះកុង (Koh Kong Resort), និងសណ្ឋាគារភ្នំពេញ ដោយសារតែលោក លី យ៉ុងផាត់ និងសម្ព័ន្ធអាជីវកម្មរបស់លោកពាក់ព័ន្ធនឹងអំពើជួញដូរមនុស្ស និងពលកម្មដោយបង្ខំក្នុងជំនួញឆបោកតាមអនឡាញ (Online) និងរូបិយប័ណ្ណគ្រីបតូ (Cryptocurrency)។
ក្រោយរងទណ្ឌកម្មនេះ ក្រៅពីមានការដកស្លាកសញ្ញាក្រុមហ៊ុនចេញពីខាងមុខអគារស្នាក់ការកណ្ដាល ក្នុងគេហទំព័រផ្លូវការរបស់ក្រុមហ៊ុន (lypgroup) និងឆាណែល (Channel) យូធូប (YouTube) របស់សណ្ឋាគារ ហ្គាឌិន ស៊ីធី (Garden City Hotel) ក៏ត្រូវបានរាំងខ្ទប់នៅតាមអ៊ីនធឺណិតផងដែរ។
វិទ្យុអាស៊ីសេរីមិនអាចទាក់ទងអ្នកនាំពាក្យក្រសួងពាណិជ្ជកម្ម លោក ប៉ែន សុវិជាតិ ដើម្បីបញ្ជាក់បន្ថែមជុំវិញរឿងនេះបានទេនៅថ្ងៃទី២៦ ខែធ្នូ។ ចំណែក តំណាងក្រុមហ៊ុន អិល.វ៉ាយ.ភី គ្រុប របស់លោក លី យ៉ុងផាត់ ក៏មិនអាចទាក់ទងបានដែរនៅថ្ងៃដដែលនេះ។
អ្នកឃ្លាំមើលលើកឡើងថា ការបិទបាំងព័ត៌មានអំពីសាជីវកម្មនៃក្រុមហ៊ុនលោក លី យ៉ុងផាត់ ក្រោយរងទណ្ឌកម្មពីសហរដ្ឋអាមេរិក អាចជាផែនការបង្វែងដានរបស់អ្នកជំនួញដែលស្និទ្ធនឹងរដ្ឋាភិបាលត្រកូល ហ៊ុន រូបនេះ ដើម្បីបញ្ចៀសហានិភ័យ និងបង្ការរងទណ្ឌកម្មពីសហរដ្ឋអាមេរិកបន្ថែម។
អ្នកអត្ថាធិប្បាយនយោបាយ លោក គឹម សុខ ប្រាប់វិទ្យុអាស៊ីសេរីថា ក្រុមហ៊ុន លោក លី យ៉ុងផាត់ បានរងផលប៉ះពាល់ធ្ងន់ធ្ងរបន្ទាប់ពីទទួលរងទណ្ឌកម្មពីសហរដ្ឋអាមេរិក។ ទោះជាយ៉ាងណា លោកយល់ថា ក្រុមហ៊ុនបង្កើតភាពស្មុគស្មាញបែបនេះ ទំនងជាចង់គេចវេះដោះស្រាយបញ្ហាផ្ទៃក្នុងជាមួយម្ចាស់ភាគហ៊ុនផ្សេងទៀតតាមរយៈការប្រកាសក្ស័យធន ប៉ុន្តែប្ដូរឈ្មោះក្រុមហ៊ុនថ្មី។ លោកក៏ទទូចដល់តុលាការស៊ើបអង្កេតលើករណីនេះ។
លោក គឹម សុខ៖ «ល្បិចកលរបស់គេក៏ទំនងជារបៀបបន្លំសហគមន៍អន្តរជាតិ គេអាចប្ដូរទៅក្រុមហ៊ុនថ្មី ឬម្ចាស់ថ្មីមកគ្រប់គ្រងមិនមែនលោក លី យ៉ុងផាត់។ ក៏ប៉ុន្តែទោះបីជាប្រើល្បិចកលបែបហ្នឹងក៏ដោយមិនអាចជោគជ័យទេ ដោយសារតែស្ថានភាពកម្ពុជាទាំងមូលជាពិសេសក្រុមគ្រួសារ ហ៊ុន កំពុងតែរងការស៊ើបអង្កេត ឬការឃ្លាំមើលយ៉ាងដិតដល់ពីសហគមន៍អន្តរជាតិទាក់ទងការរំលោភសិទ្ធិមនុស្ស និងការសម្លាប់ប្រជាធិបតេយ្យនៅកម្ពុជាទៅហើយ ទោះបីជាប្ដូរម្ចាស់ថ្មីក៏នៅក្រោមអំណាចក្រុមគ្រួសារ ហ៊ុន ដដែលមិនអាចរើពីទណ្ឌកម្មរបស់សហគមន៍អន្តរជាតិបានទេ»។
ប្រធានសមាគមឧកញ៉ាកម្ពុជា លោក លី យ៉ុងផាត់ គឺជាមនុស្សស្និទ្ធជាមួយប្រធានព្រឹទ្ធសភាលោក ហ៊ុន សែន និងកំពុងក្ដោបក្ដាប់ជំនួញធំៗនៅកម្ពុជា។ ក្រុមហ៊ុនរបស់លោកមានប្រវត្តិរំលោភសិទ្ធិមនុស្សធ្ងន់ធ្ងរ និងរំលោភយកដីពីប្រជាពលរដ្ឋនៅខេត្តកោះកុងជាច្រើន។
កាលពីថ្ងៃទី១៤ ខែកញ្ញា សមាគមឧកញ៉ាកម្ពុជាបានចេញសេចក្ដីថ្លែងការណ៍ដោយចាត់ទុកការដាក់ទណ្ឌកម្មរបស់ក្រសួងរតនាគារអាមេរិកលើលោក លី យ៉ុងផាត់ និងក្រុមហ៊ុនរបស់លោកគឺជារឿងអយុត្តិធម៌។ សមាគមឧកញ៉ាកម្ពុជាអះអាងថា លោក លី យ៉ុងផាត់ និងក្រុមហ៊ុន L.Y.P Group មិនបានធ្វើសកម្មភាពជួញដូរមនុស្សដូចការចោទប្រកាន់ឡើយ។ ផ្ទុយទៅវិញសមាគមនេះថា លោក លី យ៉ុងផាត់ និងក្រុមហ៊ុនរបស់លោកបានដើរតួនាទីអភិវឌ្ឍន៍សេដ្ឋកិច្ច និងសង្គមកម្ពុជា កសាងហេដ្ឋារចនាសម្ព័ន្ធ បង្កើតការងារដល់ពលរដ្ឋ និងធ្វើសកម្មភាពមនុស្សធម៌ទាំងក្នុង និងក្រៅប្រទេស។
គិតមកដល់ពេលនេះ មានឈ្មួញគ្រាក់ៗ និងមន្ត្រីយោធាជាន់ខ្ពស់រដ្ឋាភិបាលកម្ពុជាចំនួន ៥នាក់ហើយបានជាប់ក្នុងបញ្ជីខ្មៅរបស់សហរដ្ឋអាមេរិក។ អ្នកទាំងនោះរួមមានមេកងអង្គរក្ស លោក ហ៊ុន សែន គឺលោក ហ៊ីង ប៊ុនហៀង អនុប្រធានទី១ នៃគណៈកម្មាធិការជាតិគ្រប់គ្រងគ្រោះមហន្តរាយ នាយឧត្ដមសេនីយ៍ គន់ គីម អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងទ័ពជើងទឹកនាយឧត្ដមនាវី ទៀ វិញ និងអគ្គនាយកនៃនាយកដ្ឋានសម្ភារៈបច្ចេកទេស នៃក្រសួងការពារជាតិនាយឧត្ដមសេនីយ៍ ចៅ ភិរុណ និងឈ្មួញបំផ្លាញព្រៃឈើល្បីឈ្មោះគឺឧកញ៉ា ទ្រី ភាព៕
No comments:
Post a Comment